Կռացում առանց մեջքի ցավերի — ի՞նչ ընտրել: Մաս II
Եզրածալող հաստոցներ
Եզրածալող հաստոցի վրա արտադրանքը ձևավորելու համար օպերատորը (կամ ավտոմատ սարքը) նախապատրաստվածքը տեղադրում է հետին հենակներով աշխատանքային մակերեսի վրա, որն ունի խորշի մեջ տեղադրված և անհատական կառավարվող բարձրացող «մատներով» ռելսեր:
Նախապատրաստվածքն առաջ է մղվում և տեղավորվում սեղմակների մեջ, որոնք այն պահում են տեղում: Վերջին տարիներին եզրածալող հաստոցները կատարելագործվել են այնպես, որ դրանք կարող են աշխատել (ծալել եզրերը) ինչպես դրական, այնպես էլ բացասական ուղղությամբ՝ մեկ սարքի օգնությամբ:
Երբեմն աշխատանքային մակերեսը կարող է լինել Գ-աձև՝ «Գ»-ի հորիզոնական մասով, որը գտնվում է գործիքի հետևում: Մեծաչափ պանելների հետ աշխատելիս շատ օպերատորներ նախընտրում են աշխատել հենց հաստոցի հետևի կողմից, և նման ձևի աշխատանքային մակերեսն օգնում է նրանց պահել նախապատրաստվածքը ծալման ցիկլի ընթացքում:
Սեղմող սարքերի բարձրությունը հիմնականում որոշում է քառակողմ տուփի 90-աստիճանանոց ֆլանցների բարձրության սահմանափակումները: Եթե նախապատրաստվածքն ունի ֆլանցներ միայն մեկ կամ երկու կողմում, ապա բարձրության սահմանափակումներ չեն լինի: Սեղմող սարքերը կարող են փոխվել և վերակարգավորվել՝ կախված ծալքերի երկարությունից, որպեսզի խուսափեն նախկինում ծալված ֆլանցների հետ բախումից:
Այն բանից հետո, երբ նախապատրաստվածքը ամրացվում է սեղմակների մեջ, շարժվող շրջանակի վրա գտնվող գործիքը հպվում է դրան և ծալում այն: Շրջանակը կարող է շարժվել մինչև 0,1 աստիճանի ճշտությամբ դիրք՝ ձևավորելով անկյուն +/- կես աստիճան սխալանքով: Ստանդարտ ծալող գործիքը կարող է հարմարվել տարբեր տարբերակների, և տարբեր հաստության նյութերի ծալման համար հնարավոր է այն չփոխել:
Որոշ մոդելներում հետին հենակներով աշխատանքային մակերեսի բարձրությունը կարող է կարգավորվել, ինչն օգնում է օպերատորներին աշխատել արտադրանքի տարբեր տարբերակների հետ և կատարել բացասական ուղղությամբ ծալում: Աշխատանքային մակերեսն իջեցվում է բացասական ծալման անկյունը փոխհատուցելու համար: Եզրածալող հաստոցները կարող են ձևավորել նաև թիթեղի եզրերի երկրաչափության այլ տարբերակներ: Օպերատորը տեղադրում է նախապատրաստվածքը աշխատանքային մակերեսի վրա, և գործիքն իջնում է՝ ձևավորելով հարթ, կաթիլաձև կամ այլ ձևի եզր:
Ժամանակակից եզրածալման համակարգերը կարող են կատարել ծալում ինչպես դրական, այնպես էլ բացասական ուղղությամբ: Դա ձեռք է բերվում շրջանակի վեր և վար շարժման հաշվին: Ներքև իջնելու համար այն պետք է շրջվի դեպի դուրս՝ գործիքի լայնության չափով: Ենթադրենք՝ գործիքի լայնությունը 0,6 դյույմ է:
Դեպի վեր առաջին ծալումը կատարելու համար գործիքի վերին եզրը հպվում է թիթեղին: Թիթեղը դեպի վար ծալելու համար գործիքի ստորին եզրը պետք է ծալի նյութի մակերեսը, ինչի համար շրջանակի պտտման առանցքը պետք է տեղաշարժվի 0,6 դյույմով:
Ավելի մեծ գործիքները կարող են աշխատել ավելի մեծ հաստության նյութերի հետ: Բարակները՝ միայն փոքր հաստության, բայց քանի որ դրանք նեղ են, կարող են հասնել նախապատրաստվածքի այնպիսի հատվածներ, որոնք անհասանելի են մեծերի համար, օրինակ՝ նեղ եզրերով կպած ծալքերի դեպքում:
Թիթեղածալման մամլիչների վրա գործիքի ավտոմատ փոխումը դառնում է ավելի ու ավելի հանրաճանաչ, և վերջին տարիներին գործիքի ավտոմատ փոխումը դուրս է եկել նաև պանելածալման հաստոցների շուկա: Նման հաստոցներում ռոբոտացված մանիպուլյատորները փոխում և վերադասավորում են սեղմող հեծանի գործիքները կոնկրետ առաջադրանքի համար:
Որոշ եզրածալող հաստոցների վրա գործիքի փոխումը տեղի է ունենում ավտոմատ կերպով՝ վերին շրջանակի պտտման հաշվին: Դրա մի կողմում սովորական սեղմող գործիքն է, իսկ մյուս կողմում՝ սեգմենտային սեղմող սարքերը: Օպերատորը կարող է կատարել անհրաժեշտ քանակությամբ ծալքեր սովորական գործիքի օգնությամբ, իսկ մյուս կողմում կարող է պատրաստ ունենալ սեգմենտային սարքեր՝ տարբեր լայնության պանելների և նմանատիպ այլ նախապատրաստվածքների համար:
Ինչպես ծալման մամլիչները, եզրածալող հաստոցները այժմ նույնպես հագեցած են գործիքի ավտոմատ փոխման սարքերով, միայն թե այս դեպքում փոխվում և կառավարվում են սեղմող սարքերը, որոնք օգնում են օգտագործել շրջանակի տարբեր երկարություններ և խուսափել արդեն կատարված ծալքերի և եզրերի հետ բախումից:
Եզրածալման տեխնոլոգիայում շատ բան է փոխվել, և ծալման բազմաթիվ խնդիրներ հաջողությամբ լուծվել են: Շուկայում հայտնվել են եզրածալման լիովին ավտոմատացված համակարգեր՝ գործիքի ավտոմատ փոխմամբ և արտադրանքի մանիպուլյացիայով:
Ինչպես արդեն ասացինք, արտադրությունում կգտնվեն կիրառություններ ծալման ցանկացած տեխնոլոգիական լուծումների համար՝ մասնագիտացված գործիքից մինչև ավտոմատ համակարգեր և միմյանց հետ կապված հաստոցների շղթաներ: Թե հատկապես ինչ ընտրել՝ կախված է արտադրության պոտենցիալից, արտադրվող արտադրանքից և հաճախորդների առանձնահատկությունից: Դիմեք Italian Machinery Association-ին՝ ձեր և ձեր օպերատորների համար լավագույն տեխնոլոգիական լուծումն ընտրելու համար:
